Nishchal PS Nishchal PS - Page 2
Culture News Social
चुम्लुङ, यूएईको आयोजनामा बलिहाङ तङ्नाम बनभोज कार्यक्रम सम्पन्न
October 22, 2017
0

किरात याक्थुङ चुम्लुङ, यूएईको आयोजनामा ‘बलिहाङ तङ्नाम ३७९६, बनभोज कार्यक्रम अक्टुबर २०, २०१७ शुक्रबारको दिन दुबईको जाबील पार्कमा यूएईमा रहेका लिम्बू तथा गैर लिम्बू नेपालीहरुको सहभागितामा बलिहाङ तङ्नाम बनभोज, विविध कार्यक्रमहरुकोसाथ सम्पन्न भएको छ |

बनभोजमा कार्यक्रममा सहभागीहरुबीच आपसी परिचयात्मक कार्यक्रमबाट सुरु गरिएको उक्त कार्यक्रममा, लिम्बूहरुको विभिन्न सांस्कृतिक नाचहरु, धाननाच र च्याब्रुङ नाचका साथै प्रतियोगीतात्मक हाजिरीजवाफ, छेलो, हण्डीफोर जस्ता रोमान्चक खेलहरु समेत खेलाइएको थियो भने लारिङ्गेक, नाम्लिङ्गेक पनि खेली रमाईलो गरिएको थियो |

संस्थाका अध्यक्ष मनिष नाल्बो लिम्बूको अध्यक्षतामा सम्पन्न उक्त कार्यक्रममा नेपाली चलचित्र निर्देशक किशोर सुब्बा बिशेष अतिथि रहनुभएको थियो भने अतिथिहरुमा नेपाली समाज, यूएईका अध्यक्ष सीपी सापकोटा, नेपाली सोसल क्लब, यूएईका अध्यक्ष सालिक सुवेदी, नेपाल आदिबासी जनजाति महासंघका अध्यक्ष पासाङ शेर्पा, उपाध्यक्ष सरोज पङ्हाङ्गो, किरात याक्थुङ चुम्लुङ, यूएईका भुतपूर्व अध्यक्ष पिएस निङ्लेकु, तमू समाज, यूएईका अध्यक्ष उषा तमुस्यो, किरात राई यायोक्खा यूएईका अध्यक्ष हर्कमणि राई, थारु कल्याणकारी सेवा समाजका यूएईका अध्यक्ष किशोर चौधरी, किरात सुनुवार सेवा समाज, यूएईका अध्यक्ष नरबहादुर सुनुवार, संघिय लिम्बूवान समाज, यूएईका कार्यकारी सदस्य लासाङ निङ्लेकु, ताप्लेजुङ सेवा समाज, यूएईका अध्यक्ष डील्ली लिम्बू र महासचिव भवानी माङ्मु, तामाङ समाज, यूएईका प्रतिनिधि लगायत यूएईका क्रियाशील विभिन्न सामाजिक संघसंस्थाका प्रतिनिधिहरुको उपस्थिति रहेको थियो |

धाननाचमा उत्कृष्ट छनौट हुनेहरुमा पुरुष तर्फ चक्र सिङ्गक र महिला तर्फ नरमाया लक्सम | यसै गरी भेषभूसामा पुरुष तर्फ दिपक वनेम र महिला तर्फ सिर्जना लावोती उत्कृष्ट छनौट भएका थिए भने, हण्डीफोर खेलमा सबिता लिम्बू. छेलोमा उदिप ओख्राबो र हाजिरी जवाफमा लासाङ निङलेकु बिजयी भएका थिए | बिजयी प्रतियोगीहरुलाई प्रमाणपत्र र कप वितरण गरिएको थियो |

नेपाली चलचित्र क्षेत्र तथा लिम्बू भाषा, संस्कृति प्रवर्द्धनमा चलचित्र मार्फत योगदान पुर्याउनु भएकोमा उहाको योगदानको कदर गर्दै चलचित्र निर्देशक किशोर सुब्बालाई नेपाल आदिबासी जनजाति महासंघ, यूएई, किरात याक्थुङ चुम्लुङ, यूएई र ताप्लेजुङ सेवा समाज, यूएईले सम्मान गरेको थियो | यसै अवसरमा चुम्लुङ, यूएईका अध्यक्ष मनिष नाल्बो लिम्बूले १२ जना नयाँ सदस्यहरुलाई किरात याक्थुङ चुम्लुङ, यूएईको आजीवन सदस्यता प्रमाण पत्र वितरण गर्नु भएको थियो |

Culture Limbu Social
चासोक तङनाम २०१६ सम्पन्न
January 25, 2017
0

चासोक तङनाम २०१६ सम्पन्न

किरात याक्थुङ चुम्लुङ, यूएईको आयोजनामा, मिति डिसेम्बर १६, २०१६ दुबईको प्रसिद्द पार्क जाबील पार्कमा चासोक तङनामको अवसरमा चासोक तङनाम बनभोज २०१६ सम्पन्न भएको छ |

उक्त अवसरमा बिभिन्न लिम्बू संस्कृति झल्कने विभिन्न साँस्कृतिक कार्यक्रम तथा अन्य मनोरञ्जनात्माक कार्यक्रमहरु- हाजिरीजवाफ (लिम्बू इतिहास, संस्कृति, मुन्धुम,र नेपालको समसामयिक बिषयमा), धान नाच, च्याब्रुङ नाच, पक्लुङ (छेलो) हण्डी फोर, भाले जुधाई आदि को अयोजना गरिएको थियो |

कार्यक्रममा संस्थाको स्थापना कालदेखि संस्थामा तथा समुदायमा योगदान पुराएका भूतपूर्व अध्यक्ष तथा वर्तमान संरक्षक,निश्चल,पिएस निङलेकुलाई ताम्रपत्र प्रदान गरी अभिनन्दन गरिएको थियो भने सुवाष भण्डारी एक गैर लिम्बू भएर पनि यूएई प्रवासमा रही संस्थामा योगदान पुर्याए वापत मानार्थ सदस्य प्रदान गरिएको थियो | यसका साथै संस्थाका आजीवन सदस्यहरुलाई कियाचु नेपाल तथा यूएईको सदस्यता प्रमाणपत्र वितरण गरिएको थियो |

उक्त बनभोज कार्यक्रममा विश्व नेपाली साहित्य महासंघ केन्द्रद्वारा प्रकाशित संस्थाका भूतपूर्व अध्यक्ष तथा वर्तमान संरक्षक, निश्चल, पिएस निङलेकुको कृति गजलसङग्रह, ‘सिसिफस जीवन’ रङगवादी कवि समदर्शी काँइलाको प्रमुख अतिथ्यमा एक कार्यक्रमको आयोजना गरी लोकार्पण गरिएको थियो | उक्त कार्यक्रमको अध्यक्षता विश्व नेपाली साहित्य महासंघ यूएई शाखाका काबा अध्यक्ष सरोज पङहाङगोले गरेका थिए भने कार्यक्रम सन्चालन महासचिव राधा घायल अधिकारीले गरेका थिए |

संस्थाका अध्यक्ष सरोज पङहाङगोको अध्यक्षतामा सम्पन्न कार्यक्रममा नेपाल आदिबासी जनजाती महासंघ यूएईका प्रथम उपाध्याक्ष पासाङ शेर्पा, तामाङ समाजका अध्यक्ष महेश तामाङ किरात राई यायोक्खाका अध्यक्ष महेन्द्र राई, नेपाली सोसल क्लबका अध्यक्ष सालिक सुबेदी तथा धरान दुबई हेल्पिङ ह्यान्ड्सकि प्रतिनिधि अतिथि रहेका थिए |

Limbu News Social
चुम्लुङ साधारणसभा -२०१७
January 25, 2017
0

आज सन् १३ जनवरी २०१७ का दिन किरात याक्थुङ चुम्लुङ, युएईका वर्तमान अध्यक्ष सरोज पंहाङ्गो ज्यूको अध्यक्षतामा बरदुबईको श्रीराज लस्सी रेष्टुरेन्टको हलमा सम्पन्न कार्यसमितिको पूर्ण बैठकले संस्थाको चौथो अधिवेशन मार्च १७, २०१७ शुक्रबारको दिन सम्पन्न गर्ने गरि तीन सदस्यीय निर्वाचन अधिवेशन संयोजक समिति गठन गरी फेब्रुवरी १०, २०१७ भित्र निर्वाचन आचारसंहिता पारित गर्ने गरी आचारसंहिता निर्माण तथा अधिवेशन तयारीको जिम्मेवारी प्रदान गरिएको छ |

अधिवेशन संयोजक समिति

  1. संयोजक: निश्चल, पिएस निङ्लेकू
  2. सदस्य: नन्द ताम्लिङ
  3. सदस्य: राजु फोम्बो

यसका साथै सदस्यता वितरण सम्बन्धमा छलफल गरी कार्यसमितिको सक्रियतामा सोहि मिति देखि सदस्यता वितरण अभियान संचालन गरी मार्च ३, २०१७ को बैठकमा वितरित सदस्यहरुको आवश्यक  कागज-पत्र र शुल्क कार्यसमितिको बैठकमा उपलब्ध हुने गरि सदस्यता वितरण गर्ने र त्यो दिन सम्म बनेका सदस्यहरुले मात्र चौथो राष्ट्र अधिबेशनमा आधिकारिक सहभागी हुन पाउने समेत सर्वसम्मत निर्णय गरिएको छ |

अधिवेशन हुने समय र स्थान तथा उम्मेदवारी सम्बन्धि सूचना निर्वाचन संयोजक समितिले संस्थाको अधिकारिक फेसबूक साधारणसभा समुहमा तथा यसै वेबसाइटमा सम्प्रेस गर्ने हुदा, समय समयमा वेबसाइट तथा साधारणसभा समूह हेर्दै गर्नु होला |

Ghazal Literature News
सिसिफस जीवन सार्वजनिक
December 26, 2016
0
,

काठमाडौं । प्रवासी भूमिमा सक्रिय यूवा गजलकार निश्चल (पि एस लिम्बू) को ‘सिसिफस जीवन’ नामक गजल संग्रह सार्वजनिक भएको छ ।नेपाल प्रज्ञाप्रतिष्ठानका उपकूलपति डा. विष्णु विभु घिमिरेको प्रमुख आतिथ्यतामा राजधानीको कमलादीस्थित प्रज्ञाप्रतिष्ठानमा शुक्रबार सम्पन्न उक्त गजल संग्रह लोकर्पण कार्यक्रम  विश्व नेपाली साहित्य महासंघको आयोजनामा भएको हो । वरिष्ठ सञ्चारकर्मी तथा कवि कलाकार रमेश पौडेलको सभापतित्वमा सम्पन्न उक्त कार्यक्रममा सांसद मोहम्मद जाकिर हुसैन, सार्क सचिवालयका महासचिव तथ यूएईका लागि पूर्व राजदूत अर्जुन बहादुर थापा, वरिष्ठ गजलकार ज्ञानुवाकार पौडेल, वरिष्ठ गजलकार डा. घनश्याम न्यौपाने परिश्रमी, गैर आवासीय नेपाली संघका पूर्व उपाध्यक्ष रामेश्वर शाह विशेष अतिथिको रुपमा रहनु भएको थियो । संग्रहको लोकार्पण पश्चात् शुभकामना मन्तव्य व्यक्त गर्दै प्रमुख अतिथि घिमिरेले विदेशी भूमिमा अहोरात्र काममा खटिनुपर्ने अवस्थाबाट समेत समय निकालेर नेपाली भाषा साहित्यको विकासमा लागेकोमा प्रसंसा गर्दै नेपालीहरु संसारको जुनसुकै कुनामा पुग्दा पनि आफ्नो भाषा, भेषभुषा, साहित्य, कला र संस्कृति पनि सँगै लिएर गएको बताउँदै उहाँले अन्तराष्ट्रिय साहित्य समाज र विश्व नेपाली साहित्य महासंघले प्रवासमा नेपाली साहित्य र संस्कृतिको विकासमा योगदान पुर्याउनुका साथै प्रवासमा रचना गरिएका विविध कविता, गीत, गजल, कथाहरु र अन्य र्सिजना लगायतका साहित्यिक सिर्जनामा देशको झल्को पाइने गरेको बताउनु भयो ।

त्यसैगरी उक्त लोकार्पण कार्यक्रममा बोल्दै विशिष्ठ अतिथि यूएईका लागि पूर्व राजदूत एवं वर्तमान सार्क महासचिव अर्जुन बहादुर थापाले खाडीमा रहेका नेपालीहरुले ५० डिग्रीको प्रचण्ड गर्मीमा रहेर काम गर्दा पनि आफ्नो उत्साह र सिर्जनालाई नमारेर नेपाली साहित्य सिर्जनमा लागेको बताउदै गजलकार पिएस लिम्बु यूएईको नेपाली समाजमा सक्रिय भूमिका निभाउने सामाजिक एवं साहित्यिक व्यक्तित्व भएको स्मरण गराउनु भयो ।

त्यसैगरी यूएईको नेपाली साहित्यका मुर्धन्य व्यक्तित्व एवं सांसद मोहम्मद जाकिर हुसैनले गजलकार निश्चल  पिएस लिम्बु व्यवसायी, बौद्धिक व्यक्तित्व र युवा साहित्यकार रहेको बताउँदै लिम्बुको गजल संग्रहमा धेरै त्रुटिहरु रहेता पनि उनमा गजल सिर्जनका थुप्रै खुबीहरु समेत उजागर भएको बताउनु भयो ।

त्यसैगरी कार्यक्रममा बरिष्ठ गजलकार ज्ञानुवाकर पौडेलले निश्चलको गजलसंग्रहलाई नियाल्दा प्रवासी भूमिको उत्कृष्ठ सिर्जनाको रुपमा आफूले पाएको बताउँदै अबको समय गजल साहित्यमा उत्कृष्ट गजल लेख्नका लागि फलामको चिउरा चपाए सरी हुने औंल्याउँदै अबका पाठक आफै सचेत भएकोले अब राम्रो मात्रै होइन उत्कृष्ट गजल लेखनमा लाग्नुपर्ने बताउनु भयो । साथै उहाँले यस संग्रहका माध्यमबाट यूएई मात्र होइन त्यस वरपरका देशहरुमा बस्ने नेपाली गजलकार तथा कविहरुले यस किसिमको गजल लेख्नुपर्ने रहेछ भन्ने सचेतना जाग्ने बताउनु भयो ।उक्त कार्यक्रममा वरिष्ठ गजलकार डा. घनश्याम न्यौपाने परिश्रमीले गजलको उत्पत्ती, विकास र वर्तमान अवस्थाका बारेमा बताउँदै विमोचित संग्रह सिसिफस जीवनमाथि टिप्पणी गर्नु भएको थियो । त्यसैगरी गैर आवासीय नेपाली संघका पूर्व उपाध्यक्ष शाहले यूएई बसाइको आफ्नो अनुभव र त्यहाँबाट मौलाएको साहित्यको चर्चा गर्दै गजलकार निश्चललाई शुभकामना व्यक्त गर्नु भयो ।
कार्यक्रममा प्रवासी नेपाली पत्रकार संजालका सचिव एवं नेपाल पत्रकार महासंघ यूएई शाखाका संस्थापक संयोजक दामोदर नेपालले युएइमा नेपाली साहित्यको विजारोपणदेखि  वर्तमान अवस्थासम्म आईपुग्दा मौलाएको नेपाली साहित्यका बारेमा संक्षिप्त रुपमा प्रकाश पार्दै गजलकार निश्चलको साहित्यिक यात्राको सफलताको शुभकामना व्यक्त गर्नु भयो ।

यूएईको दुबई र नेपालमा एकै दिन एकै समयमा सार्वजनिक गरिएको उक्त गजल संग्रह लोकार्पण कार्यक्रमको सञ्चालन पत्रकार जेपी सापकोटाले गर्नु भएको थियो भने स्वागत मन्तव्य विश्व नेपाली साहित्य महासंघका उपाध्यक्ष एवं पत्रकार सागर श्रेष्ठले गर्नु भएको थियो । कार्यक्रममा सिसिफस जीवन गजल संग्रहबाट गजलकार हरि मानन्धर र कवियत्री राधा कार्कीले गजल बाचन गर्नु भएको थियो ।

गजल संग्रह लोकार्पण कार्यक्रमको अन्त्यमा विश्व नेपाली साहित्य महासंघ साउदी अरब शाखा र इजरायल शाखाले भानुजयन्तीको अवसरमा आयोजना गरेको विश्वव्यापी खुल्ला अनलाइन मुक्तक प्रतियोगीताका विजयी स्रष्टालाई पुरस्कार वितरण गरिएको थियो ।

साभार: www.nepaldubai.com

Ghazal Literature News
हार्दिक निमन्त्रणा
December 13, 2016
0

Invitation

 

विश्व नेपाली साहित्य महासंघद्वारा प्रकाशित मेरो गजल संग्रह ” सिसिफस जीवन ” को लोकार्पण निम्नानुसार हुने तय भएकोहुदा, उक्त समारोहमा यहाँहरुको उपस्थितिको अपेक्षा गरेको छु । यहाँहरुको उपस्थितिले मलाई हौसला र प्रेरणा मिल्ने विश्वाश लिएकोछु ।

 

 

***कार्यक्रम***
मिति : २०७३ पुस १ गते, शुक्रबार
स्थान : नेपाल प्रज्ञा प्रतिष्ठान, कमलादी- काठमाण्डौ
समय : दिउसो ठिक २: ०० बजे

हार्दिक नमन !

निश्चल, पिएस लिम्बू

______________

आयोजक
विश्व नेपाली साहित्य महासंघ

Ghazal Literature News
‘सिसिफस जीवन’ गजल संग्रह प्रकाशन
December 1, 2016
0
,

‘सिसिफस जीवन’ गजल संग्रह प्रकाशन

आफूलाई मन पर्ने वा माया गर्ने व्यक्तिप्रतिको श्रृङ्गार रसका अभिव्यक्ति वा सौन्दर्यको  प्रसंशा गर्न रचना गरिने अरबी साहित्य, प्रणय कविताको विधामा सुरुवात भई फारसी, उर्दू,  हिन्दी हुँदैकवि मोतीराम भट्टको समयदेखि नेपालमा भित्रिएको एक काव्य विधा हो गजल ।

Sisyphus Jeevan, A collection of Ghazals by Nishchal.

Sisyphus Jeevan, A collection of Ghazals by Nishchal.

मेरो बुझाइमा जीवन भोगाइ र बुझाइका अनुभूतिहरुलाई कोमल, हार्दिक र कलात्मक रूपमा अभिव्यक्ति गरिने काव्यिक विधा नै गजल हो । गजल, गीत र कविता एउटै होइन । सवैका आ–आफ्नै परिधी र संरचनाहरु छन् । गजलमा कहिलेदेखि कलम चलाउन थालें यकिन तथ्याङ्क त छैन तर जगजीत सिंहका हिन्दी गजलहरु पहिलेदेखि नै सुन्ने गर्थें । बिस्तारै नेपाली गजलहरु सुन्दै, पढ्दै सन् १९९९ देखि फाट्टफुट्ट गजल विधामा कलम चलाउने र साहित्यिक माहौलमा वाचनको थालनी गरेको मेरो मानसपटलमा छ । सुनसरी जिल्लाका दुई दैनिक पत्रिका ब्लाष्ट टाईम्स् र विज्ञापनमा केही फुटकर गजल र गीतहरु छपाएको थिएँ ।  नेपाली साहित्य परिषद्, यूएईको स्थापना र संस्थापक महासचिवको जिम्मेवारीसँगसँगै मेरो गजल लेखनमा तिव्रता बढ्यो । परिषद्को कार्यक्षेत्र यूएईमा मात्र सीमित नराखी नेपाल–यूएईका साहित्यिक सर्जकहरुलाई जोड्न सेतुको काम गर्ने अभिप्रायले रंगवादी कवि समदर्शी काइँलाको सभापतित्वमा नेपाल र यूएईमा बसोवास गर्ने नेपाली सर्जकहरुको संग्लग्नता गराई नेपाल–यूएई साहित्य परिषद्, यूएईको स्थापना गर्यौं । उक्त संस्थामार्फत् कवि समदर्शी काइँलाको “मान्छेको आत्महत्याको जग्गा” (कविता संग्रह), कवि तथा गजलगो उमेश राई ‘घायल’ को “अभिप्सा इन्द्रेणीको” (गजल संग्रह) तथा गजलगो पवन घर्तीमगरको “मरुभूमिका रहरहरू” (गजल संग्रह) जस्ता महत्वपूर्ण साहित्यिक कृतिहरु प्रकाशन गर्ने काम गर्यौं ।

यूएईमा अस्तित्वमा रहेका सबै नेपाली साहित्यिक संस्थाहरुलाई एकीकरण गरी एक सशक्त साहित्यिक संस्थाको विकास गर्न म स्वयं, जैकी मोजाहु (जाकिर हुसैन), दलबीरसिंह बराइली ‘घायल’ र खेमनाथ पौडेलको एउटा समूहले विभिन्न साहित्यिक संघ–संस्थाका पदाधिकारीहरुसँग पटक पटक छलफल गर्यौं । सन् २०१० मा कवि समदर्शी काँइलाको अध्यक्षतामा अन्तर्राष्ट्रिय साहित्य समाज यूएई च्याप्टरको नाममा एकीकरण भयो । यूएईमा नेपाली साहित्यको जगेर्नामा यो एउटा महान् कदम थियो । मेरो जानकारीमा आएसम्म यूएईमा नेपाली भाषा–साहित्यको इतिहासमा प्रथम पत्रिका हस्तलिखित ‘आकृति अर्धवार्षिक’ हो जुन त्यस बेलाका जुझारु सर्जकहरु प्रकाश थाम्सुहाङ, तारा बलाल ‘स्टार’, लेक योञ्जन र इन्द्र लावती लगायतकाले सुरुवात गरेका थिए । त्यसपछि हिमअरब, परदेश, हाम्रो प्रतिध्वनी (म स्वयंको सम्पादनमा), सहयात्रा आदि पत्रिकाहरुले धेरै सर्जकहरुलाई लेख्ने अवसर प्रदान गर्यो । प्रवासमा नेपाली साहित्यले संयुक्त अरब इमिरेट्स (यूएई) मा निकै राम्रो स्थान बनाएको थियो र अझ निरन्तता छ । नेपाली भाषा–साहित्यको विकासको क्रममा ‘आकृति’ देखि ‘सिसिफस जीवन’ सम्म आइपुग्दा यूएईमा अनगिन्ती कविता, गीत, गजल र कथा संग्रहहरु प्रकाशन भएका छन् ।

आफ्नो अमूल्य समय निकाली, समीक्षात्मक भूमिका लेखिदिनु हुने, प्राध्यापक डा. कृष्णहरी बराल, गजल संग्रह निकाल्न सदैव हुटहुटि तथा सल्लाह–सुझाव दिने मेरा अनन्य मित्रहरु रंगवादी कवि समदर्शी काइँला तथा सोनिया, मलाई ५० को दशकदेखि हौसला र सरसल्लाह दिइरहनुहुने गीतकार, गजलकार तथा कवयित्री दिदी प्रभा आचार्य, उत्साह दिने मित्र जैकी मोजाहु (जाकिर हुसैन), शुभेच्छुक सहयोगी भाइ प्रथम नेपाली तारा दीपक लिम्बू, बहिनी मीना सिङ्गक र अत्यन्तै छोटो समयमा सुन्दर आवरण तयार पारिदिनुहुने मित्र रमेश पौडेललाई हार्दिक आभार व्यक्त नगरी आफ्नो भनाइको बिट मार्नु मेरो कन्जुस्याइँ ठहर्नेछ ।

यसका साथै यो गजलसंग्रह ‘सिसिफस जीवन’ लाई मेरो प्रथम प्रयासको रुपमा स्वीकार गरी यसमा सम्मिलित गजलहरु पढ्नुहुने तपाईं सम्पूर्ण गजलप्रेमी पाठक, मेरा शुभेच्छुक, सहृदयी मित्र तथा आफन्तहरु र परिवारका सदस्यहरुप्रति हार्दिक आभार प्रकट गर्दछु । यस संग्रहलाई छोटो समयमा प्रकाशनको समुचित व्यवस्थापन गरिदिनु भएकोमा विश्व नेपाली साहित्य महासंघका (विनेसाम) केन्द्रीय अध्यक्ष विश्वासदीप तिगेला, विनेसाम परिवार तथा यस संग्रहलाई प्रकाशन संयोजन र डिजाइन तयार पार्न सहयोगको लागि देबेन्द्र सुर्केलीलाई धन्यवाद । यो कृति ‘सिसिफस जीवन’ तपाईंको हातसम्म पुर्याउन निस्वार्थ सहयोग गरिदिने मेरा अनन्य मित्रहरु रत्ना लिङ्देन र छिरिङ याङजेन् ह्योल्मोप्रति हार्दिक आभार ब्यक्त गर्दछु ।

अन्तमा मलाई सृजना र लेखनप्रति प्रत्यक्ष–अप्रत्यक्ष सरसल्लाह, सहयोग गर्ने, समीक्षा, टिप्पणी, प्रतिक्रिया आदि दिने तपाईं सम्पूर्ण मित्र तथा पाठकहरुलाई हार्दिक आभार व्यक्त गर्दछु । तपाईंहरुको निरन्तर साथ मेरो थप सृजनाको उर्जा बन्नेछ ।

info@pslimboo.com.np

Culture Limbu News Social
चासोक तङ्नाम बनभात -३७९५
December 1, 2016
0

“मौलिक भाषा लिपी कला संस्कृतिको प्रवर्द्धन गरौ,
चासोक तङनाम सहभागिता जनाई भब्य सफल पारौं “

लिम्बू समुदायको महान चाड “चासोक तङ्नाम-३७९५ “को अवसरमा, किरात याक्थुङ चुम्लुङ यूएईको आयोजनामा, यहि आउदो डिसेम्बर १६, २०१६ को दिन लिम्बू समुदायसंग समन्धित आकर्षक साँस्कृतिक प्रस्तुतिताका साथै विविधि अतिरिक्त कृयाकलापहरुबीच “चासोक तङ्नाम बनभात” को आयोजना गरिने गरिदैछ | कार्यक्रमका आकर्षणहरु;

१: प्रतियोगितात्मक हाजिरीजवाफ
२:धान नाच
३: च्याब्रुङ नाच
४::पक्लुङ ( छेलो )
५ : भाले जुधाई
६: लिम्बू पहिरन प्रदर्शन आदि

सहभागी जनाउन इच्छुक महानुभावहरुले, पोस्टरमा उल्लेख गरिएका व्यक्तिहरुलाई सम्पर्क गरी, विस्तृतरुपमा जानकारी लिन सक्नुहुनेछ |

नोगेन \धन्यवाद !

आयोजक
किरात याक्थुङ चुम्लुङ, यूएई
www.facebook.com/chumlunguae

Literature
कविता- म मृत्यु हुँ …
October 22, 2016
0
,

म मृत्यु हुँ …

म मृत्यु हुँ
मलाई कसैले रोक्न सक्दैन
म एक अकाट्य सत्य,
र अदृश्य भय हुँ – कसैले देख्न सक्दैन
म मृत्यु , एक अकाट्य सत्य हुँ
मलाई न त उमेरले रोक्न सक्छ,
न त सीमानाका जंगे पिलरहरुले नै छेक्न सक्छ
मलाई न त पिंजडामा बन्द गर्न सकिन्छ,
न त मलाई “करान्दरु पेनिटेनशरी” मा थुन्न सकिन्छ |

म मृत्यु हुँ- मेरा अनेक रुपहरु छन्,
पक्षघात क्यान्सर एड्स
हृदयघात बनी लिन्छु ज्यान
भूकम्प, सुनामी चट्याङको
बाढी पहिरो मेरा केहि रुपहरु हुन्
म दुर्घटनाको रुप लिन्छु
कहिले आगो कहिले बिष
कहिले हतियार-गोलि बारुद आदि आदि
म मृत्यु हुँ -मेरा अनेक भयानक रुपहरु छन्

म मृत्यु हुँ – मेरो कुनै बिदा हुदैन
मैले २४X ७ काममा व्यस्त हुनुपर्छ
लडाईं, भूकम्प, सुनामीको बेला
मैले आराम पाउदिन
म मृत्यु हुँ, मेरो कहिल्यै बिदा हुदैन |

म मृत्यु हुँ – मलाई निम्तो पनि गर्छन्
तथापी मेरो उपस्थितिमा
धेरै दुखी बन्छन्
धेरैको आँशुको कारण बन्छु म
नचाहेर पनि धेरैले रुवाउनु पर्दछ
यद्यपी मेरो उपस्थितिले कतिलाई पीडामुक्त गर्छ
सकेसम्म टार्ने कोशिस गर्छु,
जवरजस्ती गर्नेहरुकोमा
कहिले हस्पिटलमा
कहिले बाटोमै, एम्बुलेन्समै
नभ्याई नभ्याई आतिथ्य स्विकारी दिन्छु

म मृत्यु हुँ- कसैलाई बक्सिन
एक महान महात्मा,
गौतम बुद्धलाई बक्सिन
अहिंसावादी महात्मा गान्धीलाई छोडिन
बीर योद्दाहरू- नेपोलिय,
क्रुर शासकहरुलाई बाँकि राखिन
हिटलर सद्दाम गद्दाफी छोडिन
बिनलादेन लाई राखिन

म मृत्यु हुँ- मेरा कोहि मित्र हुन्नन्
म कसैलाई छोड्दिन
युद्ध, भूकम्प सुनामी आदि मेरा मित्रहरु होईन
ढिलो चाँडो
बाराक ओबामा, भ्लादमीर पुटिन,
मोदी, प्रचण्ड, केपी, देउबा
एन्जिलोना, ब्रुस विल्स, शाहरुख
र संसारका कसैलाई छोड्दिन
म मृत्यु हुँ |

म मृत्यु हुँ- अजित
मलाई युद्दमा पराजित गरिन्न
मेरो बिरोधमा मोर्चाबन्दि गर्छन्
कहिले धामी झाँक्रीहरु
कहिले डाक्टर नर्सहरु
पटक पटक युद्द गरी
मलाई अलमल्याउने असफल गर्छन्
तर अहँ मलाई हराउदैनन् र म कहिले हार्दीन
कहिल्यै कसैले हराउन सक्दैनन् मलाई
किनभने अजित -म मृत्यु हुँ |

Limbu Limbuwan Opinion Political
मंचको महाधिवेशन संगै उत्पन्न प्रश्नहरु
June 21, 2016
0

संघीय लोकतान्त्रिक रास्ट्रिय मंचको मिति २०७३ असार १७ – १९ आसन्न महाधिवेशन भव्यताका साथ आयोजना हुदैछ । भव्यताकासाथ सफल बनोस्, शुभकामना तर यसका साथै अनगिन्ती प्रश्नहरु उब्जिएका छन् ।

१: के महाधिवेशनको आयोजना गरिदा अपनाईनु पर्ने न्युनतम प्रावधान, बिधी समेत नअपनाई बेलाईएको महाधिवेशन वैधानिक हुन्छ ?

२: संघीय लोकतान्त्रिक रास्ट्रिय मंचकाको केन्द्रीय महाधिवेशन अगावै इकाई, जिल्ला आदिका अधिवेशन सम्पन्न कहिले र कहॉ गरियो ?

३: संघीय लिम्बूवान पार्टी नेपालका अध्यक्ष कसरी संघीय लोकतान्त्रिक रास्ट्रिय मंचको महाधिवेशन बोलाउन सक्छन् ?

४: अध्यक्ष मानशिक रूपमा भेडेटार एकता र ९ बूँदे सम्झौताको बिपक्षमा भएकोले सुरू देखिनै
संघीय लिम्बूवान पार्टी नेपाल संस्थागन गर्न तर्फ नलागी बिभिन्न निर्णयहरु संस्थागत निर्णय नगरी ब्यक्तिगत ढंगबाट मनोमानी निर्णय गरी पार्टी बिभाजन गराउन तिरनै अग्रसर रहेको महसुस गरिएको थियो, यो कदमले प्रष्ट्याउछ ।

Limbu Limbuwan Opinion Political
मंच महाधिवेशनबाट अपेक्षित निर्णयहरु
June 21, 2016
0

संघीय लोकतान्त्रिक रास्ट्रिय मंचको मिति २०७३ असार १७ – १९ महाधिवेशन भव्यताका साथ आयोजना हुदैछ | यस महाधिवेशनबाट निम्नानुसार निर्णयहरु पारित गरी भव्यताकासाथ सफल बनोस्, शुभकामना ! लिम्बूवान जनताबाट अपेक्षित निर्णयहरु, निम्नानुसार छन् |

१:  महाधिवेशन प्रतिनिधिहरुको दुई तिहाई बहुमतद्वारा मिति २०७१ साउन १९ को भेडेटार एकताको सम्झौतालाई आधार बनाई, लिम्बूवान पक्षधर राजनीतिक पार्टीहरुमा एकताकोलागि नेतृत्वमा दबाव सिर्जना |
२:  संघीय लोकतान्त्रिक रास्ट्रिय मंच ९ बुँदे भेडेटार सम्झौता अनुसार राष्ट्रिय शक्तिको आवश्यक महसुस भए, एकितृत पार्टीको निर्णय मार्फत ब्युताउने गरी, अहिलेलाई
३:  नौ (९) बुँदे सम्झौता आघिका पाँच पार्टीहरु अबिलम्ब खारेजीकोलागि पहल गर्ने, गराउने |
४:  संघीय लिम्बूवान पार्टी नेपाललाई यथाशीघ्र निर्वाचन आयोगमा दर्ता प्रकृया अगाडी बढाउने |
५:  लिम्बूवान राजनीतक एकताको निम्ती आफु सम्बद्द सम्पूर्ण देशविदेशका शाखा इकाईहरुलाई एकता नखल्बल्याउन आग्रह गर्दै, प्रेस बिज्ञप्ति गर्ने |

आसन्न महाधिवेशनले भेडेटार एकतालाई लत्याई , ९ बुँदे सम्झौता तोड्ने निर्णय गरी, विधिवत अलग हुने निर्णय गरे संघीय लोकतान्त्रिक रास्ट्रिय मंच र मंच सम्बद्द संघीय लिम्बूवान पार्टीले राजनीतिक आधार गुमाउनेछ |

 

© 2005-2017 pslimboo.com.np | All Rights Reserved